Благодарение на синоќешната победа на Челси над Манчестер Сити, Ливерпул математички ја освои титулата, прва по 1990 година.
Челси му направи услуга на својот лут ривал и му овозможи на 7 кола до крајот на мир да ја прослави долгоочекуваната титула.
Синоќа на „Стемфорд Бриџ“ падна Манчестер Сити, кој и онака тешко дека ќе го стигнеше Ливерпул, но коло за коло ја одложуваше прославата на „Црвените“.
Со одличниот гол на американскиот виртуоз Кристијан Пулишич домаќините поведоа на радост на навивачите на Ливерпул кои покрај малите екрани со нетрпение го следеа натпреварот.
Во 55. минута Кевин Де Брујне изведе прецизен слободен удар оставајќи го Кепа Арисабалага без шанса со што израмни на 1:1 најавувајќи ново одложување на прославата на Ливерпул.
Сепак, радоста на Челси и на Ливерпул стигна во 78. минута кога Вилијан од белата точка го совлада Едерсон. Пеналот го предизвика Фернанџињу кој со рака спречи чист гол и за тој потег заработи директен црвен картон.
Ливерпул со 23 бодовна предност на 7 кола до крајот и математички е шампион. Конечно, првпат по сезоната 1989/90 „Црвените“ се шампиони, освојувајќи ја титулата број 19. Сезонава и тоа како заслужено.
Од друга страна,. Челси синоќа не се потеше бадијала. „Сините“ играа првенствено за себе бидејќи се борат да го задржат 4. место на табелата кое води во Лигата на шампионите. Благодарение на оваа тешка победа Челси сега им бега 5 бодови на Манчестер Јунајтед и Вулверхемптон.