Враќањето на белгискиот напаѓач Ромелу Лукаку ги подели навивачите на Интер, некои повторно го прифатија, а други не му простија.
Лукаку се врати во Интер во текот на летото, откако ја мина сезоната во Челси по трансфер од 113 милиони евра.
Не беше задоволен од животот во Лондон, а во едно интервју изјави дека сака да се врати во Интер, што му ја влоши ситуацијата во клубот.
Натпреварот против Викторија Плзен во Лигата на шампионите му беше прв по двомесечна пауза поради повреда, а кога излезе на теренот, дел од навивачите гласно го поздравија. Сепак, најжестоките навивачи на Интер останаа рамнодушни.
„Немојте некој да се осмелил да го поздрави овој“, порача преку мегафон лидерот на навивачите на Интер.
Тоа е доказ дека јадрото на навивачите на „нероаѕурите“ сè уште не му го простило на Белгиецот заминувањето во Челси.
Лукаку постигна гол во последните минути од играта, а потоа го бакна дресот и истрча кон навивачите. Едната рака ја стави на срцето, а другата ја подигна во воздух за да се извини уште еднаш.
