Манчестер Сити денеска ќе му достави понуда на Јувентус од 30 милиони евра за португалската ѕвезда, тврди добро упатениот новинар на Sky Sport, Џанлука Ди Марцио.
Наводно, Кристијано Роналдо дефинитивно одлучил да го напушти Јувентус и побарал од торинскиот клуб да биде продаден.
Ди Марцио тврди дека „Граѓаните“ денеска ќе понудат 30 милиони евра, онолку колку што бара „Старата дама“, и Јуве ќе ја прифати понудата без проблем.
И други италијански медиуми тврдат дека меѓу Португалецот и трофејниот торински клуб е завршено и само се чека официјална понуда од Сити.
Роналдо нема да биде на располагање за наредниов натпревар, а неговиот менаџер Жорже Мендеш веќе е во преговори со челниците на Сити за личните услови од договорот на својот клиент.
Од претходно беше јасно дека Јуве бара најмалку 28 милиони евра за да го пушти Роналдо. Британските медиуми додаваат дека ваквиот развој на настаните ќе значи збогување на Рахим Стерлинг со Манчестер.
Од друга страна, напаѓачот Габриел Жезус ќе остане во клубот бидејќи Пеп Гуардиола инсистира тој да остане.
За потсетување, Роналдо дојде во Јуве летото 2018 година од редовите на Реал Мадрид за 100 милиони евра. Во црно-белиот дрес досега одигра вкупно 134 натпревари на кои постигна 101 гол.