Италијанскиот селектор не е задоволен и покрај тоа што неговата земја има дури три претставници во четвртфиналето од Лигата на шампионите - разочаран е затоа што за овие клубови играат премногу странци.
„Не можам да зборувам за преродба на италијанскиот фудбал само затоа што има три наши клуба во четвртфиналето од Лигата на шампионите. Ќе можев доколку за Милан, Наполи и Интер играа 33 Италијанци, но со оглед на тоа што тоа не е можно, ќе бев задоволен и со половина“, коментираше Манчини на првиот ден од собирот нa „Аѕурите“ во базата Коверчано во Фиренца.
Наполи, Интер и Милан имаат големо мнозинство на странци во своите редови, па оттаму и шареноликоста на списокот на играчи кои Манчини ги повика за претстојните квалификациски натпревари за пласман на ЕУРО 2024 против Англија и Малта.
Наполи моментално има само 3 репрезентативци и тоа Алекс Мерет (резервен голман), Џовани Ди Лоренцо и Матео Политано, Милан има само 1 во Сандро Тонали, додека Интер со Матео Дармјан, Франческо Ачерби, Федерико Димарко и Николо Барела има 4.
Останатите во мартовскиот состав на Манчини доаѓаат од Јувентус, Рома, Лацио, Аталанта, Торино, Монца, Сасуоло, Лече, Кремонезе и Удинезе, а од странство има од ПСЖ, Арсенал, Вест Хем, Лидс, Фрајбург и Тигре.
Во квалификациската група на Италија е и нашата Македонија.
