Поранешната легенда на италијанскиот фудбал го даде своето мислење за актуелнава сезона во Серија А во која неговиот Интер е пред освојување на Скудетото.
За дневниот неаполитански весник Il Mattino, Марко Матераци даде свој осврт на сезоната во која гледа неизвесна борба за местата кои водат во Лигата на шампиони.
„Мислев дека Милан ќе падне, но тие продолжија да прават добри резултати и верувам дека заслужуваат да се квалификуваат за Лигата на шампионите“, вели популарниот Матрикс.
До крајот на сезната има уште 8 кола, а од второто до седмото место бодовната разлика е 9 бодови, што значи дека дури шест тима се борат за трите преостанати места кои водат во најдоброто европско клупско натпреварување.
„Аталанта ита со полна брзина, додека Јувентус е најлошиот кој го имам видено. Наредното коло со Наполи - Интер и Аталанта - Јувентус ќе биде одлучувачко“, смета тој.
Милан 63, Јувентус 62, Аталнта 61, Наполи 59, Лацио 55 (натпревар помалку), Рома 54 - тоа се клубовите кои сакаат пласман до четвртото место.
„И покрај сите проблеми кои ги имаат, Гатузо го воскресна тимот и ја освои Копа Италија. Тој како никогаш да не ги имаше на располагање своите напаѓачи. Да се игра без Осимнех и Мертенс прави разлика, да не зборувам за Кулибали кој се повреди, а закачи и ковид“, заврши поранешниот дефанзивец, познат по своите остри стартови.
