Кристијан Брукнер, главниот осомничен за исчезнувањето на Британката Меделин Мекен, се појави пред судот во Германија под обвинение за сексуален напад и силување во одделни случаи, пишува The Guardian.
47-годишникот се појави пред судот во Брауншвајг со голем медиумски и јавен интерес. Почетокот на судењето, со зголемено обезбедување, беше одложен поради големиот број луѓе кои се обидуваа да влезат во судницата.
Судењето потоа беше одложено по само девет минути, поради забелешките на адвокатот на Брукнер, Фридрих Филшер, кој го обвини судијата дека е пристрасен и не е способен да ги суди случаите.
Судењето на Брукнер ќе се фокусира на сексуалните престапи што тој наводно ги извршил помеѓу 2000 и 2017 година во Португалија. Обвиненијата не се поврзани со случајот Мекен, во кој тој е осомничен, но не е обвинет.
Во овој случај, тој беше обвинет по три точки од обвинението, една за силување и две за сексуална злоупотреба на деца.
Ова е прво појавување на Брукнер во јавноста откако првпат беше поврзан со случајот Мекен во 2020 година.
Се верува дека тој бил во областа каде што последен пат била видена Медeлин за време на нејзиниот летен одмор во Португалија. Меѓу 1995 и 2007 година тој живеел во Алварге, каде ограбувал хотели и продавал дрога, соопшти германската полиција.
Брукнер со години живеел во Португалија, вклучително и во одморалиштето Праја да Луз, каде тогаш тригодишната Мекен исчезна од станот во кој нејзиното семејство беше на одмор во 2007 година. Тој негираше вмешаност во нејзиното исчезнување.