Хари Мегваер ќе го напушти Манчестер Јунајтед во летниот преоден рок. Менаџерот Ерик Тен Хаг нема доверба во некогаш најскапиот светски дефанзивец. За Мегваер нема место во составот и покрај тоа што двајцата стартери, Рафаел Варан и Лисандро Мартинес, поради повреди ја завршија сезоната.
Манчестер Јунајтед, во бунар фрли 80 милиони евра, колку што изнесуваше неговиот трансфер од Лестер во 2019 година. Дефанзивецот во ниту еден момент не успеа да се наметне и покрај тоа што поранешниот менаџер, Оле Гунар Солскјер му ја даде капитенската лента.
Изминатите две сезони, поради честите грешки, Мегваер им служи за потсмев на фудбалските фанови. Тен Хаг нема доверба во него, па поради повредите на Варан и Мартинес, во централниот дел од одбраната покрај Виктор Линделеф игра левиот бек Лук Шо.
Football Transfers, тврди дека Мегваер кариерата ќе ја продолжи во Лондон. Интерес за него покажале Вест Хем и Тотенхем. Според овој извор, Јунајтед ќе прифатат околу 45 милиони евра само за да се ослободат од Мегваер.
Вест Хем покажал серизен интерес, но прашање е дали Мегваер ќе се најде во плановите на новиот менаџер, бидејќи е извесно дека Дејвид Мојс нема да ги предводи „Чеканите“, наредната сезона.
Преселбата во Тотенхем ќе зависи од тоа дали Брендан Роџерс ќе седне на клупата на клубот од Северен Лондон.
Football Transfers, претходно објави дека Спарс сакаат да ги привлечат во главниот град играчите на Лестер, Џејмс Медисон и Јури Тилеманс, доколку нивниот поранешен тренер биде промовиран во нов тренер на Тотенхем.
Претходно за Мегваер интерес покажа и Интер кој уште зимата го запиша во листата на желби како замена за Милан Шкриниар, кој летово се сели во ПСЖ како слободен играч. Но, бидејќи за Интер опција е само позајмица, до такво нешто тешко дека ќе дојде.
