Натпреварувачката во УФЦ, Мекензи Дерн, вели дека за убавите жени кои се бават со овој спорт е многу потешко бидејќи поради нивниот изглед треба дополнително да се докажуваат во рингот.
„Секогаш мораме да се докажуваме. Гледајте кај мажите, ако борачот е убав во очите на гледачите, другите му се смеат, велат 'Не е добар'. Но за жените, не, тие велат 'Ајде да ја гледаме бидејќи е убава'. Низ такви работи минуваме, мора многу повеќе да се докажуваме“, рече Дерн при гостувањето во португалскиот подкаст на MMA Fighting’s.
Дерн откри и дека имала голем број на машки следбеници на социјалните мрежи, но бројката драстично опаднала кога објавила дека е бремена.
„Загубив 50.000 следбеници кога објавив дека сум бремена, а вкупно 80.000 до мојата наредна борба“, разочарано вели таа. Тоа докажува дека ја следат само поради нејзиниот изглед, а не поради нејзините борби.
„Бришев некои фотографии од поранешни спонзори, разни работи, и си помислив 'Ајде да видам дали луѓето кои коментирале тука сѐ уште ме следат'. Не ме следеа. Потоа гледав и други стари слики и многумина имаа коментирано работи како 'Многу си јака' и слично. Повеќето од нив денес не ме следат“, додава 28-годишната борачка.
Некои нејзини колешки, поради нивниот изглед, добија понуди да се појават разголени на платформата OnlyFans, како на пример поранешната бразилска шампионка Џесика Андраде, која и се пофали дека благодарение на таквите фотки си ги исплатила сите долгови.
„Не ги судам оние што се на OnlyFans, но тоа не е за мене. Мојот фокус е да ги претставувам жените и да го променам мислењето дека треба да се гледаат бидејќи се убави, бидејќи за мене секоја жена е убава, секоја е симпатична и секоја прикажува добра борба“.
