На Меланија Трамп денеска ѝ е последен ден како прва дама на САД.
„Ми беше огромна чест да бидам ваша прва дама. Ви благодарам за љубовта и поддршката. Ќе останете во моите мисли и молитви. Бог нека ве благослови сите вас и вашите семејства и Бог нека ја благослови оваа прекрасна нација“, стои во писмото за збогување на Меланија, која е по потекло од Словенија, а во САД дошла да работи како модел и останала со „Ајнштајнова виза“ како „имигрант со извонредни способности“.
Поранешната манекенка за која на Википедија ќе прочитате дека е и „бизнисменка“, стана прва дама кога нејзиниот сопруг Доналд Трамп беше избран за 45. претседател на САД во 2016 година.
Денеска таа се збогува со Белата куќа и замина со стил – облечена во црно од глава до пети. Но, во нејзиниот моден избор не се најде ниту едно име на американски дизајнер. Напротив, таа во свој стил остана „верна“ на извиканите луксузни брендови што „гарантираат“ дека сте „жена со статус“. Меланија ни за време на мандатот на Трамп не се грижеше многу дали и како ќе ги претставува домашните дизајнери, за разлика од нејзините претходнички, особено Мишел Обама.
Меланија за последниот ден како прва дама на САД избра кратко палто на францускиот бренд Chanel, фустан на италијанското дуо Dolce & Gabbana и високи потпетици на уште едно француско модно име - Christian Louboutin. Изгледот го заокружи со големи црни очила за сонце и чанта Hermès Birkin од црна крокодилска кожа.
Продолжете да читате: Прва дама со стил: Најдобрите модни комбинации на Меланија Трамп