Ако бевте загрижени за иднината на франшизата Call of Duty, бидете спокојни, таа останува на платформата PlayStation.
Microsoft потврди дека нема да ја отстрани франшизата Call of Duty од платформата PlayStation доколку регулаторите дадат зелено светло за купување на Activision Blizzard. Иднината на играта беше причина за загриженост кај сопствениците на конзоли PlayStation кои се плашеа дека играта ќе стане ексклузива за Xbox и PC по купувањето.
Во новата епизода од подкастот Same Brain што заедно го водат познатите јутјубери iJustine и Џена Езарик, презентерите го прашаа Фил Спенсер, шеф на одделот за Xbox, дали аквизацијата на Activision Blizzard значи дека некои игри повеќе нема да бидат достапни на PlayStation платформата.
„Нема да ја тргнеме Call of Duty од PlayStation. Знам дека не ме прашавте тоа, но да бидеме јасни - тоа не е нашата намера", рече Спенсер. „Додека постои PlayStation на која можеме да испорачаме, нашата намера ќе биде да продолжиме да ја иапорачуваме Call of Duty - слично на она што го направивме со Minecraft кога ја купивме таа игра“.
„Ги проширивме достапните места за играње Minecraft, не ги намаливме, и добро ни оди. Тоа, според мое мислење, беше добро за заедницата на Minecraft, и сакам да го направам истото додека размислуваме каде може да оди Call of Duty во иднина“, објаснува Спенсер.
Минатата недела, покрај можното поскапување на производите на Xbox, Спенсер најави дека планира да ја донесе Call of Duty на конзолата на Nintendo Switch, како и да ја одржува играта на другите конзоли.
Најголем противник на аквизицијата на Microsoft беше Sony, кој ги вознемири регулаторите за можноста за отстранување на најпопуларната игра со пукање во светот од платформата PlayStation, но Спенсер вели дека е уверен дека ќе им биде дозволено да ја преземат оваа компанија во зделка вредна 68,7 милијарди долари.