Најдобриот хрватски фудбалер, Лука Модриќ, уште еднаш изрази незадоволство од густиот календар на Лигата на нации.
„Секој натпревар за репрезентацијата е важен, без разлика дали тоа е пријателски или натпревар од Лигата на нации. Многу ми е важно кога играм за националниот тим. Меѓутоа, да се стават на календарот 4 натпревари во 10 дена по ваква сезона, тоа е нечовечко. Но, со облекувањето на репрезентативниот дрес мора да го покажете максимумот. Освоивме 7 бодови, ги дадовме сите сили. Првиот натпревар беше многу лош, но ги поправивме работите во следните три натпревари“, изјави играчот од средниот ред на Реал Мадрид и Хрватска по синоќешната победа од 1:0 на гости кај актуелниот светски шампион Франција.
Токму Модриќ ја донесе победата синоќа откако во 5. минута реализираше удар од белата точка.
По четири кола во Група 1 од Лигата А во Лигата на нации, Данска е лидер со 9 бодови, Хрватска е втора со 7, Австрија има 4, а Франција е последна со само 2 бода.
