Тотенхем го чека набилдан распоред недела-вторник-четврток-недела, а Жозе Мурињо сака својот најдобриот играч да игра дури и против најслабите противници.
Португалскиот стратег очекува бункер од страна на четвртолигашот Лејтон Ориент вечерва во Лига Купот како и од нашата Шкендија в четврток во Лига Европа. За пробивање на такви бункери му е потребен искусен и добар голгетер, а тоа е Хари Кејн.
„Во принцип, Хари мора да игра. Особено на вакви натпревари против екипи кои во теорија се инфериорни, екипи кои ќе играат дефанзивно, ни треба голгетер. Сакам Хари да игра, но да видиме дали ќе може, ако се чувствува подготвено“, објаснува Мурињо.
Кејн постигна 2 гола на последните два натпревара, но забележа 4 асистенции, сите за Сон Хјон-мин во неделната победа од 5:2 над Саутемптон.
„Тој е искусен играч, си го познава телото подобро од било кој спортски научник или лекар. Доколку е подготвен за игра, тогаш се разбира дека ќе игра“.
Се очекува сепак вечерва Тотенхем да настапи во комбиниран состав со тоа што шанса ќе добијат голманот Џо Харт, кој ќе дебитира, потоа Серж Орје, Муса Сисоко, Тоби Алдервејрелд и Ерик Ламела од првата минута
Не се очекува новаците Серхио Регилон и Гарет Бејл да бидат во комбинација за овие два натпревара против инфериорните екипи.
„Не знам кога Гарет ќе може да игра. Она што го знам е дека мотивацијата му е висока, среќен е што е во клубот кој му е во срце, многу е среќен што ќе игра со нас, а кога играч има таква мотивација, тогаш периодот за опоравување може многу, многу да се скрати и играчот многу побрзо да се врати во ритам“, вели Мурињо.
Натпреварот со Лејтон Ориент на гости е денеска од 19 часот, додека в четврток од 20 часот Тотенхем игра во Скопје против Шкендија.