Жозе Мурињо, португалскиот тренер кој неодамна доби отказ од Рома, сака да се врати во Манчестер Јунајтед, објави Daily Mail.
Британскиот весник наведува дека од извори блиски до Мурињо дознава дека Португалецот верува дека има незавршена работа на Олд Трафорд по заминувањето во декември 2018 година.
Мурињо го презеде Јунајтед во 2016 година по заминувањето на Луис ван Гал. Во првата сезона ја освои Лигата на Европа и Карабао купот, а во следната заврши на второто место во Премиер лигата зад недопирливиот Манчестер Сити. Имаше договор до 2021 година, но по серијата лоши резултати доби отказ.
Јунајтед сезонава е во голема криза, се наоѓа само на деветтото место во Премиер лигата и има 16 бода помалку од лидерот Ливерпул. Британските медиуми сметаат дека тренерот Ерик тен Хаг наскоро би можел да добие отказ.