Adidas денеска ја претстави топката со која ќе се игра на претстојното Европско првенство во Германија.
Топката се вика Fussballliebe (Фусбаллибе - Љубов кон фудбалот), а доминира белата боја со триаголни дезени во црна, жолта, црвена и зелена боја.
Структурата на поединечните делови на топката е направена од истите материјали како и Al-Rihla, топката за Мундијалот 2022 во Катар.
Цената на Fussballliebe ќе биде 170 американски долари.
Европските првенства почнувајќи од она во 1984 година и Tango Mundial имаат посебна топка. Fussballliebe е 11-та по ред. Првите две првенства во 1960 и 1964 вооопшто немаа брендирани топки, додека од 1968 до 1980 немаа топки специјално направени за нив, иако се играше со топките Telstar Elast, Telstar Durlast и Tango Italia.
Да потсетиме, последен пат кога Германија организираше големо натпреварување беше Мундијалот во 2006 година, а топката тогаш се викаше Teamgeist (Тимгајст - Тимски дух). Најмногу им лежеше на Италијанците, кои станаа светски шампиони.
Утре почнува последниот квалификациски прозорец по кој наредната недела ќе се знаат и сите 24 учеснички на завршницата од 14 јуни до 14 јули 2024 година. Досега пласман покрај домаќинот Германија обезбедија Белгија, Франција, Португалија, Шпанија, Шкотска, Турција, Австрија и Англија.
