Јапонската тенисерка Наоми Осака се најде на насловната страница на списанието Sports Illustrated.
23-годишната Осака ќе ја претставува Јапонија на Олимписките игри во Токио, а освен што е успешна тенисерка, таа стана и модна икона. Таа сега се појави на насловната страница на магазинот Sports Illustrated во издание на костими за капење.
Четирикратната победничка на Грен слем турнири беше фотографирана во асиметричен едноделен костим за капење со проѕирни делови, а носеше и обетки направени од школки.
„Нема сомнение дека Наоми е една од најдобрите спортистки во светот, а местото на насловната страница е логично. Таа освои титули во претходните години и сега оди на Олимпијада, но ние ја славиме Наоми за нејзината страст и сила да постојано руши бариери кога станува збор за еднаквост, социјална правда и ментално здравје“, рече уредникот на Sports Illustrated, Ем Џеј Деј.
Во моментов Осака е втора тенисерка во светот.
