Попладнево во Цирих шампионите на седумте континентални зони на ФИФА ја дознаа судбината на овосезонското издание од Светското клупско првенство.
Ланското издание во Катар требаше да биде последно според актуелниот формат, но пандемијата го одложи новиот проширен формат, па така Светското клупско првенство ќе се одржи уште еднаш, за последен пат како годишен турнир. Домаќин се Обединетите Арапски Емирати и тоа од 3 до 12 февруари нареднава 2022 година.
Денешната жрепка не траеше долго со оглед на малкуте учесници и однапред определениот пат на некои од екипи. Топчињата ги влечеше поранешниот швајцарски репрезентативец Блерим Џемаили, родум од Македонија.
Во воведното коло ќе играат домаќинот Ал Џазира, како шампион на ОАЕ, против Окленд Сити од Нов Зеланд кој е претставник на Океанија. Поради пандемијата сезонава не се играше Лигата на шампионите на Океанија, па нема ни победник, а Окленд Сити беше одбран да биде нејзин претставник како најуспешна екипа.
Токму за второто коло беше направена денешната жрепка. Фортуната одлучи шампионот на азиската Лига на шампиони, Ал Хилал од Саудиска Арабија, да игра против победникот од Ал Џазира и Окленд Сити, а другиот натпревар да го сочинуваат африканскиот шампион Ал Ахли од Египет и северноамериканскиот шампион Монтереј од Мекиско.
Во полуфиналето своите противници ги чекаат шампионите на Европа и Јужна Америка. Челси ќе игра против победникот од Ал Хилал и Ал Џазира/Окленд Сити, додека бразилски Палмејрас го чека подобриот од Ал Ахли и Монтереј.
Победниците од двете полуфиналиња ќе се сретнат во големото финале закажано за 12 февруари во Абу Даби.
На денешната жрепка беше претставен и официјалниот амблен на 18-тото издание на Светското клупско првенство на ФИФА: