И покрај забраната, навивачите на загрепски Динамо синоќа отпатуваа за Атина во пресрет на натпреварот од 3. квалификациско коло од Лигата на шампионите против грчкиот шампион АЕК, а во судирите што настанаа загина еден навивач на грчкиот клуб, јавуваат локалните медиуми Gazzetta.gr и SPORT24.
Според Gazzetta.gr, 22-годишниот навивач починал откако бил прободен со остар предмет, а се наведува дека брзата помош го префрлила младиот човек во болница каде лекарите се бореле да му го спасат животот.
Со него во болница биле уште неколку повредени навивачи, додека шестмина од нив во очај, држејќи се за лицата и постојано разговарајќи на телефон, чекале да видат што ќе се случи со членот на нивната група.
Газета пишува дека повредените навивачи биле распослани на кревети по ходниците, а вратите на операционата сала постојано се отворале и затворале.
Меѓу повредените има и Грци и Хрвати кои организирани во конвој од 150 луѓе пристигнаа во Атина.
Иако навивачите на Динамо, попознати како Bad Blue Boys, биле забележани и обезбедување било подготвено за нив, се чини дека се организирале затоа што по пристигнувањето во градот се распрснале низ улиците.
Синоќа околу 23 часот BBB дошле во населбата Неа Филаделфија каде се наоѓа на стадионот на АЕК и ги нападнале локалните навивачи, наводно се обиделе да упаднат во „Аја Софиа“ стадионот, но не успеале.
Избила жестока тепачка, употребени биле молотови коктели, палки и други предмети, а полицијата го потиснала инцидентот и уапсила 83 лица.
Натпреварот меѓу АЕК и Динамо се игра вечерва од 20:45 часот.
