Директорот на Австралија опен, Крег Тајли утрово ѝ се обрати на јавноста и откри дека руските и белоруските тенисери ќе имаат право на настап на првиот Грен слем турнир во сезоната 2023, додека ситуацијата околу Новак Ѓоковиќ е неизвесна.
Една од најважните вести во светот на спортот годинава беше забраната која му беше изречена на Новак Ѓоковиќ за влез во Австралија. Тогаш најдобриот тенисер на светот беше депортиран од оваа земја и му беше забрането учество на реномираниот Австралија опен.
Затоа, постои можност во јануари следнава година да имаме нов спортско-дипломатски скандал и драма. Овојпат ситуацијата ќе биде уште посложена, бидејќи руските и белоруските тенисери добија забрана за настап на некои турнири поради воената агресија врз Украина на нивните земји.
Според зборовите на директорот на Австралија опен, Крег Тајли, Русите и Белорусите не мора да се грижат за својот настап на првиот Грен слем турнир во новата сезона.
„Во моментов, руските и белоруските тенисери ќе имаат право да играат на Австралија опен. Единствената разлика е во тоа што тие нема да играат под свои знамиња. Тие мора да бидат независни играчи“, изјави Тајли за новинарите.
Најголемо внимание привлече ситуацијата со Новак Ѓоковиќ. Српскиот тенисер не е толку сигурен за настапот и се наоѓа во специфична ситуација бидејќи има тригодишна забрана за влез во земјата откако на почетокот од ова агодина влезе во Австралија без сертификат за примена вакцина против COVID-19, по што беше ставен во карантин, а потоа и депортиран.
„Што се однесува до нас, Ѓоковиќ е добредојден. Но, тој мора да го реши својот проблем со австралиската Влада. Не сум имал никаков контакт со властите и нема да лобирам во име на српскиот тенисер. Тие мора да го решат проблемот, а ние потоа ќе ги следиме инструкциите“, додаде Тајли.
Иако има уште многу време до Австралија опен, веќе се зборува дали Ѓоковиќ ќе има право на настап на турнирот на кој го држи рекордот. Го пропушти последниот Австралија опен затоа што не беше вакциниран, а може да ги пропушти и наредените два бидејќи во сила му е тригодишната одлука за забранет влез во државата.
111-тото издание на Австралија опен ќе се одржи во втората половина на Јануари, а бранител на тронот е Рафаел Надал. Рекордер по бројот на триумфи е токму Ѓоковиќ со 9 освоени пехари (2008, 2011, 2012, 2013, 2015, 2016, 2019, 2020 и 2021).