На изненадување на многумина, Арсенал, а не Манчестер Сити, е првиот финалист во ФА Купот.
Откако уште одамна ја загуби титулата во Премиер лигата, на Пеп Гуардиола му остана надежта дека со триумф во најстарото клупско натпреварување на светот, ФА Купот, ќе ја спаси сезоната. „Граѓаните“ сезонава освоија трофеј, но Лига Купот никој не го сфаќа сериозно бидејќи едноставно нема никаква тежина.
Синоќа на „Вембли“ тимот на Манчестер Сити се соочи со Арсенал и доживеа елиминација. Габонецот Пјер-Емерик Обамејанг со головите во 19. и 71. минута ги фрли во очај играчите на Пеп и ги испрати „Топчиите“ во големото финале. Ниту новите дресови на „Граѓаните“ не им се покажаа талични.
Арсенал е всушност најтрофеен клуб во ова натпреварување со 13 победи. Последен пат славеше во 2017, а претходно триумфираше и во 2015 и 2014. Нема загубено финале од 2001 година. Рекордер е и по одиграни финалиња бидејќи ова ќе му биде 21.
Денеска од 19 часот се игра второто полуфинале во кое се среќаваат Манчестер Јунајтед и Челси. „Црвените ѓаволи“ имаат 12 титули, додека „Сините“ имаат 8.
