Со синоќешните натпревари завршија четирите групи од Лигата на шампионите, па се ближи крајот на битката за нокаут фазата од најелитното фудбалско натпреварување во Европа.
Фудбалерите на Манчестер Јунајтед веќе по групната фаза го завршија катастрофалниот настап во Лигата на шампионите, бидејќи со синоќешниот пораз од Баерн натпреварувањето во групата А го завршија на последното место.
„Црвените ѓаволи“ ги пречекаа „Баварците“ на „Олд Трафорд“, а за минување им беше потребна победа заедно со реми во пресметката меѓу Копенхаген и Галатасарај на „Паркен“. На крајот беа далеку од тоа сценарио (загубија 0:1) и од оваа група во осминафиналето на Лигата на шампионите се пласираа Баерн и Копенхаген, бидејќи данскиот клуб го совлада Галатасарај со 1:0 во директна пресметка за второто место.
Баерн беше подобриот противник на теренот од почетокот на натпреварот и во првото полувреме се закануваше преку Хари Кејн и Лерој Сане, но сепак безуспешно. Лоша среќа го снајде Јунајтед на крајот од првото полувреме бидејќи Хари Мегваер мораше да го напушти теренот поради повреда. Во вториот дел не видовме многу поинаква слика на теренот бидејќи немаше многу возбудувања, но Баерн сепак успеа да постигне гол во 71. минута. „Баварците“ одиграа одлична акција, на крајот Кејн направи убава асистенција за Кингсли Коман, а тој го матираше Андре Онана за 1:0.
Лукас Лерагер во 58. минута погоди за победа на Копенхаген на стадионот „Паркен“, а со тоа данскиот шампион неочекувано го освои второто место во многу тешката група и се пласираше во осминафиналето.
Треба да се каже и дека Копенхаген го заврши натпреварот со 10 играчи бидејќи голгетерот Лерагер на крајот заработи втор жолт картон, со што беше исклучен.
Баерн заврши на првото место во групата со 16 бодови и може да се надева на поповолна ждрепка за осминафиналето, Копенхаген е втор со 8, Галатасарај трет со 5 бода и оди во Лига Европа, додека за Манчестер Јунајтед, кој освои само 4 бода, заврши европската сезона.
Веќе беше познато дека Арсенал и ПСВ ќе се пласираат во нокаут фазата од Лигата на шампионите, додека Ланс и Севиља во директен дуел одлучуваа за местото што води во Лига Европа. На крајот, францускиот претставник се радуваше на третото место, додека Севиља се прости од Европа за оваа сезона.
На стадионот „Филипс“ во Ајндховен се одигра дербито помеѓу ПСВ и Арсенал, а резултатот беше 1:1. Гостите играа во прилично изменет состав бидејќи Микел Артета реши да одмори неколку од најважните играчи. Во ваква ситуација прв поведе Арсенал. Се играше 42. минута кога Еди Нкетиа постигна гол по асистенција на Реис Нелсон. Арсенал замина на одмор со водство.
И покрај гол негативата, ПСВ продолжи да игра добро на стартот од вториот дел, а во 51. минута Јорбе Вертесен постигна убав гол за израмнување на 1:1. Арсенал постигна уште еден гол пред крајот на натпреварот преку Јакуб Кивиор, нобеше поништен по интервенцијата на ВАР поради офсајд.
Дуелот меѓу Ланс и Севиља директно одлучуваше кој од третата позиција ќе го продолжи патувањето во Лига Европа, а кој ќе се збогува со Европа за оваа сезона. Натпреварот заврши со победа на домаќините од 2:1, со што Французите се пласираа во следната рунда од натпреварувањето.
Во првото полувреме немаше голови, а по паузата пенали ги донесоа возбудувања. Првиот го видовме во 63. минута кога Пшемислав Франковски погоди од белата точка за водство на Ланс. Израмнувањето го видовме во 79. минута кога Серхио Рамос погоди исто од белата точка за Севиља, откако двапати го изведе пеналот. Првиот беше повторен. Првиот пенал го одбрани голманот Брис Самба, но ги прекрши правилата, па Рамос во вториот обид погоди со паненка.
Кога Севиља тргна на сѐ или ништо, во претпоследната минута од судиското надополнување домашните изведоа одличен контранапад, а Анџело Фулџини со гол го однесе Ланс во Лига Европа. За Севиља и официјално заврши оваа европска сезона.
Директна битка за нокаут фазата водеа и Наполи и Брага, а на крајот италијанскиот тим победи на домашен терен со 2:0. Уште пред натпреварот Наполи имаше значително поголеми шанси бидејќи му одговараше домашна победа, но и реми. Работите веќе беа решени на полувремето кога „Партенопеите“ имаа предност од два гола.
Првиот гол во 9.тата минута беше автогол на Сердар Саатџи, а пред паузата Виктор Осимхен погоди за 2:0. Тоа беше конечниот резултат, па Наполи оди во нокаут фазата од групата Ц.
Во истата група Реал Мадрид по пресврт победи против Унион Берлин со 3:2. Во 45. минута Лука Модриќ имаше шанса да погоди од пенал, но голманот на Унион одбрани. Во следниот напад казна на другата страна бидејќи искусниот Кевин Фоланд погоди за водство на берлинците.
Продолжението донесе многу подобра игра на Реал и целосен пресврт во режија на Хоселу со два гола.
Во групата Д имавме директна пресметка за првото место во групата, што е многу важно и носи статус на носител во жрепката од нокаут фазата.
Интер на свој терен го пречека Реал Сосиедад, а мечот заврши без голови, што целосно им одговараше на гостите од Баскија, кои благодарение на подобрата гол-разлика дојдоа до привилегиран статус во жрепката.
Во оваа иста група видовме возбудлив дуел меѓу Салцбург и Бенфика кој заврши со победа на гостите од 3:1.
Анхел Ди Марија постигна одличен гол директно од корнер за да ги доведе Португалците во водство по половина час игра, пред Рафа Силва да ја удвои предноста на Бенфика пред паузата. Лука Сучиќ до крајот само го ублажи поразот на Австријците, пред конечно Артур Кабрал са погоди за конечни 3:1.
Со оваа победа Бенфика го освои третото место и ќе продолжи да се натпреварува во Лига Европа, додека Салцбург се збогува од европските натпреварувања.
Вечерва се играат натпреварите од последното коло во групите Е, Ф, Г и Х, со што ќе заврши групната фаза.
