Германската влада денеска ја прифати реформата на законот за државјанство што го олеснува добивањето германски пасош.
„Сакаме граѓаните кои долго време се дел од нашето општество да почнат да учествуваат во демократските процеси во Германија“, рече министерката за внатрешни работи Ненси Фезер од СПД (Социјалдемократска партија на Германија) при претставувањето на нацрт-законот за државјанство.
Таа рече дека реформата на системот за стекнување државјанство е еден од најважните проекти на социјалдемократско-зелено-либералната влада и еден од важните механизми во борбата за таленти на глобалниот пазар на трудот.
„Носиме модерен закон за имиграција во согласност со нашето различно општество и модерна земја“, рече Фезер.
Најважниот дел од законската реформа се однесува на скратувањето на периодот по кој странците кои живеат во Германија можат да аплицираат за германско државјанство од сегашните 8 на 5 години.
За лицата кои на посебен начин се истакнуваат во процесот на интеграција, преку голем напредок во учењето јазик или исклучителни достигнувања на работното место, рокот ќе се скрати на 3 години.
Ќе биде дозволено и двојно државјанство, што досега беше можно само за државјани на една од земјите членки на Европската Унија или во исклучителни случаи.
За членовите на т.н. работници од првата генерација, стекнувањето барања за државјанство ќе биде поедноставен јазичен тест. Наместо претходниот писмен тест за познавање на германскиот јазик, доволна ќе биде „едноставна усна комуникација“.
„Ова е задоцнето признание за заслугите на првата генерација гастарбајтери во Германија“, рече Фезер.
Правилото според кое барателите за државјанство мора да можат финансиски да се издржуваат себеси и своите семејства останува на сила. Исклучоци се можни во исклучителни случаи за самохрани родители или лица со посебни потреби.
Опозициската Христијанско-демократска унија ЦДУ/ЦСУ ја критикуваше одлуката на федералната влада и ја обвини за воведување дополнителни мерки во време на зголемена миграција што може дополнително да ја интензивира нерегулираната миграција и со тоа да го поларизира општеството.
„Кој ги намалува пречките за стекнување германско државјанство во време на рекордна миграција во Германија, предизвикува дополнителна поларизација на општеството“, изјави лидерот на пратеничката група на ЦСУ во Бундестагот, Александер Добринт, алудирајќи на популарноста на партиите кои се против имиграцијата.
Тој тврди дека „експресното стекнување државјанство“ не ја поддржува интеграцијата.
Опозициската десничарска популистичка Алтернатива за Германија (СфД) ја обвини федералната влада за „раздавање“ со германското државјанство.
Предлог-законот за државјанство е дел од пакетот на сојузната влада, која има намера суштински да го реформира законодавството за странците во Германија, а една од главните цели е зголемена имиграција на специјалисти кои му се потребни на германскиот пазар на труд.