На 5 и 6 март, со почеток од 20 часот, во МКЦ ќе се одржи премиера и втора изведба на театарската претстава „Одлука“.
Автор на претставата е Хана Миленковска, која исто така ги потпишува режијата и драматургијата. Коавтори и актери се Мартин Ѓоргоски и Чедомир Митевски.
„’Одлука’ е уметничко истражување за носењето одлуки, чиј краен исход е театарска претстава. Секојдневно сме соочени со низа избори кои мора да ги направиме, некогаш мали и бенигни, некогаш непријатни. Во ова дело, ние, авторите, решивме тргнувајќи од себе од различни агли да ги набљудуваме сопствените ограничувања, начините на кои сме условувани да размислуваме, препреките што сами си ги создаваме“, велат авторите.
„Да се создаде чисто гледливо парче театар без никаков материјален влог освен нашето време, здравје и волја, се покажа како поголем предизвик од очекуваното. За среќа налетавме на одлични сојузници по пат. Тргнавме од тоа дека ќе ги анализираме одлуките што сме ги донеле досега, како поединци, но и како општество, па можеби ќе разбереме што отсега. Не сме сигурни што разбравме, но знаеме дека ни е важно тоа што го направивме. Не сме убедени во исходот, но важно ни е некој ова да го види и чуе“, објаснува екипата и додава:
„Се боревме да бидеме разговетни и смели кон себе и светот. Сфативме дека сме способни да сме кохерентни онолку колку што светот во кој живееме има смисла. И одлучивме дека тоа е во ред.“
Продуцент на претставата е Дино Чупевски, графичкиот дизајн е на Матеја Николиќ, а логистичка поддршка даде КСП - Центар Јадро. Стручни соработници на проектот се Дамјан Дуковски, Владимир Лукаш, Евгенија Здравевска, Владимир Димовски, Калија Киселички, Драган Теодосиев и Јоана Ристевска.
Билетите се достапни на билетарница и онлајн преку bileti.mkc.mk.
Настанот ќе биде организиран со почитување на актуелните ковид-протоколи.