Македонскиот и гибралтарскиот селектор ги отворија картите за денешниот натпревар во рамките на 4. коло од Лигата на нации, Група 4 од Лига Ц.
Како што и најави на синоќешната прес-конференција, Благоја Милевски направи доста промени во стартниот состав давајќи им шанса на играчите кои беа на клупа или влегуваа во игра во второто полувреме на претходните три натпревари. Така, сега помеѓу стативите шанса доби Дамјан Шишковски, во одбраната лево е Кире Ристевски, десно Тодор Тодороски, а на централните позиции Ѓоко Зајков и Никола Серафимов. Средината ја сочинуваат Бобан Николов, Елиф Елмас и капитенот Енис Барди, на крилните позиции се Езџан Алиоски лево и Дарко Чурлинов десно, додека најистурен е Бојан Миовски, за кого ова е прв настап од почеток. За овој натпревар не се во комбинација повредениот Александар Трајковски и суспендираниот Давид Бабунски (парни жолти).
Селекторот на Гибралтар, уругвајскиот стратег Хулио Сесар Рибас, се одлучи за: Бредли Банда на голот, во одбраната капитенот Рој Чиполина, Луи Анесли, Џејмс Оливеро и Рис Лопес, во средината Скот Вајзман, Ли Кашаро и Итан Брито, а во нападот Лиам Вокер, Грем Ториља и Џулиан Валарино.
Натпреварот ќе го суди молдавска четворка со Думитру Мунатеан како главен , ќе му помагаат Андреј Бодеан и Виктор Мардари, а четврти судија е Роман Житари. Во ВАР собата главен ќе биде Михал Оценаш, а помошник Бранислав Ханцко - и двајцата од Словачка.
Почетокот е закажан за 18 часот на Националната Арена „Тодор Проески“ во Скопје. Директен пренос ќе оди на ArenaSport 1.