Најдобриот светски фудбалер, Лионел Меси (33), е нов играч на ПСЖ, потврди францускиот клуб на социјалните мрежи.
Меси денеска пристигна во Париз на медицински прегледи и потпишување договор. Трансферот го потврди и ПСЖ со видео, најавувајќи дека нападот на најтрофејниот француски клуб ќе го засили легендарниот Меси.
Иако финансиските детали за договорот не се објавени, L’Equipe претходно откри дека Меси се договорил за двегодишна соработка, со можност за продолжување на уште една година, а Аргентинецот ќе добива околу 35 милиони евра по сезона.
Истиот извор наведе дека Меси одбил да му го земе бројот 10 на Нејмар и дека е подготвен да игра во дресот со бројот 19, а во редовите на „парижаните“ се приклучи како слободен играч по истекот на договорот со Барселона.
Со доведувањето на Меси, ПСЖ го формираше можеби најубиствениот напад што сме имале можност да го гледаме во светот на фудбалот. Покрај Аргентинецот, во фантастичното трио ќе бидат и Килјан Мбапе и Нејмар, а кога ќе ги додадеме другите ѕвезди, јасно е дека „парижаните“ го создадоа најсилниот тим, барем „на хартија“.
Веќе летово беа донесени Ахраф Хакими, Џорџино Вајналдум, Серхио Рамос и Џанлуиџи Донарума, а Данило Переира од Порто беше откупен, па навивачите на ПСЖ не можеа да замислат подобар преоден рок.
Меси во младинските категории на Барселона пристигна во 2000 година од Њуелс Олд Бојс, и целата своја професионална кариера ја помина во дресот на Каталонците.
Тој постигна 772 гола и 305 асистенции за Барса на 778 настапи, а од 1 јули оваа година, тој беше слободен играч.
Во дресот на Барселона освои дури 34 трофеи, од кои најважни се десет титули шампион на Шпанија и четири Лиги на шампиони, а рекордни шест пати ја освои Златната топка - признание за најдобар фудбалер на светот.
Официјалната церемонија за потпишување на договорот ќе биде извршена наскоро по положувањето на лекарските прегледи.
