Вселенската карпа голема половина километар не претставува опасност по нашата планета бидејќи само ќе помине во „близина“.
Руските научници открија нов масивен астероид кој се движи накај Земјата, објави синоќа Институтот за применета математика М.В. Келдиш (Институт прикладной математики им. М.В.Келдыша). Фотографии од оваа вселенска карпа, чија големина е околу половина километар во дијаметар, беа споделени на социјалните мрежи.
„Ноќта на 1 октомври две опсерватории во Југоисточна Русија го потврдија откритието дека новиот астероид 2022 SE37 ѝ се приближува на Земјата“, објави Институтот.
Астероидот орбитира околу Сонцето на елиптична траекторија, правејќи цел круг за околу 3,44 години, додаде Институтот. Објектот, сепак не претставува непосредна опасност по нашата планета, потенцираат руските научници.
Институтот Келдиш на својот канал на Telegram објави фотографии од астероидот, кој фотографиран со моќни телескопи се гледа како ништо повеќе од една точка на небото.
Астрономот Јуриј Балега од Руската акедемија на науки, говорејќи за TASS рече дека 2022 SE37 не би требало некогаш да стане опасен за Земјата.
„Ова е сепак уште еден од 30.000-те астероиди откриени од астрономите ширум светот. Се движи на растојание од многу милиони километри од нашата планета и не претставува опасност“, рече Балега.
