Pfizer објави дека повлекува три од своите лекови за висок крвен притисок од пазарот.
Станува збор за Accuretic и неговите две генерички верзии дистрибуирани од Greenstone.
Pfizer самостојно одлучи да ги повлече таблетите кои содржат повисоки нивоа на нитрозамини, соединенија кои можат да доведат до развој на рак. Но, компанијата во соопштението рече дека „не постои таков непосреден ризик за пациентите кои го земаат овој лек“.
„Нитрозамините најчесто се наоѓаат во водата и храната; во сувомеснати и млечни производи и во зеленчук. Секој е изложен на одредено ниво на нитрозамин. Овие нечистотии може да го зголемат ризикот од рак доколку некој е изложен на нив во големи количини во подолг временски период“, соопшти фармацевтската компанијата.
Pfizer додаде дека досега нема извештаи за негативни ефекти по употребата на гореспоменатите лекови за висок крвен притисок и дека овие производи имаат безбедносен профил врз основа на повеќе од 20 години искуство.
Ги советуваат пациентите кои досега ги земале нивните лекови да се консултираат со својот лекар за алтернативни терапии.
Нитрозамините во лековите се формираат во процесот на производство, поради одредени хемиски реакции. Ги наоѓаме во храната, тутунот, козметиката, водата, воздухот, земјоделските хемикалии.
Најмногу сме изложени на нив преку пушењето и тутунските производи, а најчесто преку исхраната која вклучува сувомеснати производи, пржена и пушена конзервирана храна. Нитрозамините во водата за пиење, воздухот и козметиката се присутни во прилично ниски концентрации.
