Обвинителството во Торино ја продолжи истрагата во просториите на Јувентус, а според италијанските медиуми постои можност славниот клуб да уништил доверливи документи.
Истражителите се базираа на договорите постигнати со Јувентус со неговите играчи за намалување на платите и да си го олесни работењето за време на пандемијата на коронавирус.
Сепак, постои можност Јувентус да ги прикрил сите овие постапки и на крајот да ги уништил документите, вклучувајќи го и потпишаниот договор со Кристијано Роналдо.
Обвинителството од Торино смета дека фудбалерите на Јувентус на крајот добиле 60 милиони евра врз основа на приватни договори со клубот, но дека не биле пријавени кај надлежните органи. Наводно, документите се уништени.
Според Gazzetta dello Sport, Јувентус се договарал со играчите за намалување на платите и додатоците, но тоа го вклучил во буџетот за следната година. Така ја растоварил сметката за финансиски фер-плеј.
Финансиската полиција денеска изврши нови претреси во клубот по налог на судијата Марко Џаногли како дел од истрагата за можното лажно финансиско салдо на клубот. Официјалниот став на Јувентус за ова сè уште се чека, бидејќи клубот не се огласил.
Исто така, се наведува дека клучен доказ би можело да биде прислушуваниот телефонски разговор на спортскиот директор на клубот Федерико Черубини со неименуван правен советник. Во него се споменува измамничка трансакција во врска со спорните документи, а медиумите во Италија сметаат дека тоа е договорот на Роналдо со Јувентус.