Тренерот на Аугсбург го прекрши задолжителниот карантинот и со тоа е првата жртва на новите правила во Бундеслигата.
Хајко Херлих утре нема да може да го води својот тим на домашниот дуел со Волфсбург. Имено, тој ја прекршил забраната за напуштање на хотелот со тоа што отишол до супермаркет за да си купи паста за заби.
Сега 48-годишниот стратег мора да биде двапати тестиран за коронавирусот и притоа да остане во задолжителен двонеделен карантин, што значи дека не само утрешниот, туку ќе го пропушти и наредниот натпревар на гости кај Шалке 04, а воедно нема да може да ги води и тимските тренинзи.
„Згрешив што излегов од хотелот. Немав паста за заби и одидов до маркет. Иако ги следев сите мерки за хигиена кога го напуштив хотелот, не можам сега да го сменам тоа што се случи. Во оваа ситуација, не бев пример за следење за мојот тим и за јавноста“, изјави Херлих.
Херлих е поранешен фудбалер кој 9 сезони играше во нападот на Борусија од Дортмунд, а стрелеше и во дресот на Баер Леверкузен и Борусија Менхенгладбах. Се пензионираше на 32 години поради тумор на мозокот. Токму поради таа комплицирана операција за отстранување на туморот, Херлих е во ризичната група кога станува збор за зараза со коронавирусот.
