Поразот на Серена Вилијамс во, најверојатно, последниот натпревар во нејзината блескава кариера, е најгледан тениски телевизиски пренос во 43-годишната историја на ESPN објави денеска американската телевизиска мрежа.
Поразот на Серена Вилијамс во 3. коло на УС опен од австралиската тенисерка Ајла Томљановиќ во просек го следеле 4,8 милиони гледачи, а максималната бројка достигнала 6,9 милиони гледачи во 22:15 часот.
Серена Вилијамс, која во кариерата освои 23 грен слем титули, по подолга пауза се врати на тенискиот терен за настан на УС опен што предизвика голем интерес во спортската јавност.
Нејзините три натпревари во поединечна конкуренција и еден дуел во двојки во кој настапи со својата сестра Венус ја зголемила гледаноста во текот на првите пет дена на грен слемот во Њујорк во просек за 1,1 милиони гледачи, што е раст од 101% во однос на 2021 година, објави ESPN.
