Во изминатите 24 часа во Грција се регистрирани 43 нови случаи на COVID-19, од кои 85 отсто, односно 36 се туристи кои влегле во земјата, соопшти Националната служба за јавно здравје на Грција.
Според грчката новинска агенција АНА-МПА, сите 36 позитивни случаи се од тестовите направени на граничниот премин Промахонас (Кулата) на границата со Бугарија, а 20 од нив се српски туристи.
Грчката Влада вчера соопшти дека од шест часот утрово до 15 јули 2020 година во Грција ќе биде забранет влез за државјани на Србија, врз основа на анализата на епидемиолошките податоци.
На граничниот премин Промахонас (Кулата) што воедно е и единствениот отворен за влез на туристи, голем број српски државјани уште на полноќ пристигнале, во обид да влезат во Грција пред шест часот, односно пред да стапи во сила забраната за влез.
Грчката Национална служба за јавно здравје и Министерството за здравје на Грција објавија насоки и јасни упатства за процедурата во случај на заразување со коронавирусот додека престојувате во земјата како туристи.
Од правец на Бугарија патници смеат да влегуваат во Грција преку граничниот премин Промахонас, додека од другите премини на границата со оваа земја, влезот ќе биде дозволен само во одредени услови.