Кошаркарот на Голден Стејт Вориорс, Стеф Кари, ќе отсуствува од теренот поради повреда на левата потколеница, соопшти денеска актуелниот шампион во НБА.
Кари се повреди ноќта меѓу саботата и неделата на натпреварот против Далас Маверикс кој заврши со победа на Голден Стејт од 119:113. Во соопштението на Вориорс се наведува дека Кари нема да игра на утрешниот натпревар против Оклахома Сити Тандер.
„Во наредните денови ќе се знае колку Кари ќе отсуствува од терените“, се додава во изјавата на актуелниот шампион во НБА, а оваа информација ја потврди и тренерот Стив Кер.
„Мислам дека најважно е што тој ќе биде надвор од теренот некое време. За неколку дена повторно ќе направиме проценка. А добрата вест е дека ќе се врати. Не знаеме точно кога, но не се работи за повреда што ќе го натера да ја пропушти целата сезона. Се надеваме дека ќе се врати на теренот што е можно поскоро“.
Да потсетиме, Кари беше избран за стартер на Ол-стар натпреварот, кој е закажан за 19-ти овој месец во Солт Лејк Сити.
