Револтиран што беше заменет на натпревар во кој неговиот тим го победи Лион со 2:1, Лео Меси одби да се ракува со тренерот Маурисио Почетино.
За прв пат во лигашки натпревар ПСЖ стартуваше со Меси, Нејмар и Килјан Мбапе во нападот, но тројката во офанзивата не импресионираше.
Почетино го прекина домашното деби на Меси во 75. минута во обид да ги промени работите на теренот и успеа во тоа бидејќи Мауро Икарди влезе од клупата и постигна гол за победа.
Меѓутоа, Меси беше очигледно вознемирен кога го напушти теренот поради таквата одлука на неговиот тренер.
Тој одби да се ракува со својот сонародник упатувајќи му поглед полн лутина, како да не можеше да поверува дека тој е жртвуван.
Инаку, Аргентинецот се мачи да се вклопи откако се пресели во Париз и сѐ уште се обидува да се пронајде себеси во новата средина.
Дури и на теренот, работите не одат според планот, бидејќи славното напаѓачко трио на ПСЖ немаше координација во нападот.
Меси е без голови во досегашните три настапи и не успеа да му помогне на својот тим да победи над Бриж во Лигата на шампионите кон средината на неделата, и покрај тоа што во нападот му се придружија Нејмар и Мбапе.
Синоча Лион поведе со голот на Лукас Пакета во 54. минута, а ПСЖ прво израмни преку Нејмар од пенал во 66. минута, за во судиското надополнување Икарди да ја донесе победата.
