Шпанскиот фудбалер Серхио Рамос доби спектакуларен пречек по враќањето во Севиља по 18 години. Тој одби значително побогати понуди од Саудиска Арабија и Турција, ги стави емоциите на прво место и како што вели - си го исполнил сонот.
Рамос својот исклучително успешен професионален пат во спортот го започна пред 18 години, а во средата вечерта беше претставен на стадионот „Рамон Санчес-Писхуан“ како ново-стар играч на овој андалузиски клуб.
Поранешниот капитен на Шпанија откако зачекори на теренот на исполнетиот стадион не можеше да ги сокрие солзите, а локалните медиуми јавуваат дека на стадионот имало повеќе од 23.000 навивачи.
Видеата и фотографиите што следуваат најдобро покажуваат како сето тоа изгледаше синоќа.
„Ова е незаборавен ден за мене, го исполнив мојот сон, се враќам дома после 18 години. Сакам да ја искористам оваа прилика да им се заблагодарам на претседателот, спортскиот директор, потпретседателот, на сите вас навивачите, за можност да се вратам дома... Сите ми овозможивте да го повторам ова, ме водат емоциите, и верувам во нашиот проект. Го затворив кругот во Париз и започнувам нов во Севиља“, рече Рамос.
Најжестоките навивачи на Севиља, односно ултрасите на овој клуб порачаа дека нема да преземаат никакви дејствија како навреди или удари кон играчите, но меѓу редови може да се прочита дека не заборавиле на маката што ја почувствувале поради Рамос во минатото.
„Ние не сме водени од омраза или незадоволство, туку од љубов и гордост кон нашиот клуб, неговата историја и неговите навивачи. Веруваме дека самиот предлог за овој трансфер веќе подразбира недостаток на почит кон вредностите што нѐ направија големи, за симболите и легендите кои го бранеа нашиот клуб и според илјадниците навивачи на Севиља кои страдаа под потсмевот на овој играч во минатото“, изјавија навивачите на Севиља и додадоа:
„Нема да преземаме никакви дејствија како што се удирање или навреда на играчи за време на натпреварите. Сепак, не можеме и не треба да покажеме поддршка за акции кои се против принципите и достоинството на Севиља“.
Рамос за прв пат играше фудбал во Севиља на 7-годишна возраст, а откако ги мина сите помлади возрасни групи, дебитираше за првиот тим во 2004 година.
За Севиља одигра 49 официјални натпревари и постигна 3 гола. Реал го купи следната година за 27 милиони евра и наредните 16 години ги помина во Мадрид.
Како еден од најдобрите стопери во историјата на фудбалот, со Реал освои 23 трофеи, а од 2021 до 2023 година беше член на ПСЖ со кој освои уште 3. За шпанската репрезентација има 180 настапи и 23 гола, како и две европски и една светска шампионска титула.
