Фудбалерите на Рома победија на гостувањето кај Џеноа, додека Аталанта и Интер ремизираа во 7. коло од италијанската Серија А.
Рома отиде во посета на Џеноа без капитенот Един Џеко, кој е заразен со коронавирус, но и покрај тоа, „Волчицата“ стигна до сигурна победа со резултат 3:1.
Во 45+2. минута Хенрих Мхитарјан погоди за водство на Рома, а Марко Пјаца израмни на 1:1 во 50-та минута.
Победата за Рома ја донесе Мхитарјан, кој ги постигна преостанатите два гола во 66-та и 85-та минута од натпреварот.
Аталанта и Интер ремизираа 1:1. Интер поведе во 58-та минута кога погоди Лаутаро Мартинес, а конечните 1:1 ги постави Алексеј Миранчук во 79-та минута од средбата.
Претходно денеска, Лацио и Јувентус ги поделија бодовите во 7. коло од италијанската Серија А.
Натпреварот, кој предизвика многу полемики во изминатите неколку дена, со оглед на тоа што имаше вистинска конфузија со бројот на играчи на Лацио кои беа заразени со коронавирусот, не разочара.
Јувентус поведе во 15-та минута кога по убавата акција по десната страна, Хуан Квадрадо ја исфрли топката во шеснаесетникот, а Кристијано Роналдо ја испрати топката во празната мрежа за водство на „Старата дама“ од 1:0.
Роналдо можеше да стигне до вториот погодок во 43-та минута, го лобуваше голманот Пепе Реина, но ја погоди само гредата.
По 76 минути, Португалецот се повреди, а во игра влезе Пауло Дибала.
Лацио имаше неколку шанси на натпреварот да изедначи, и во 90+5. минута конечно стигнаа до 1:1.
Хоакин Кореа помина на левата страна покрај тројца играчи на Јувентус и му асистираше на Фелипе Каиседо кој погоди од свртување за конечни 1:1.
