Каталонците и холандскиот стратег се договорија на двегодишна соработка, па од денеска Куман е нов предводник на Барса, објави клубот.
Барселона експресно најде замена за Кике Сетјен кој по бламажата од 8:2 против Баерн во Лигата на шампионите експресно заработи отказ.
Куман изминативе две години беше селектор на Холнадија на чија репрезентација успеа да ѝ го врати стариот сјај откако „Лалињата“ не успеаја да се квалификуваат за ЕУРО 2016 и Мундијалот во 2018.
Тој е поранешен дефанзивец кој долги години го носеше дресот на Барселона, поточно од 1989 до 1995 година. Како играч со тимот од „Камп Ноу“ може да се пофали со куп трофеи: 4 пати Ла Лига, еднаш Копа дел Реј, 3 пати Суперкопа де Еспања и по еднаш Куп на шампиони и УЕФА Суперкуп.
Пред да стане селектор на Холандија, сега 57-годишниот Куман ги предводеше Евертон, Саутемптон, Фејнорд, АЗ, Валенсија, ПСВ, Бенфика, Ајакс и Витесе, а од 1998 до 2000 му беше асистент на Луи ван Хал токму во Барселона.