Спорот меѓу платеничката воена група Вагнер и руското Министерство за одбрана продолжува да ескалира. Откако рускиот претставник и поранешен генерал-полковник Виктор Соболев му се закани на секој што ќе му се придружи на Вагнер со казна затвор до 15 години, тој доби закани.
Конфликтот меѓу платеничката војска и редовната војска во Русија трае веќе подолго време. Во прашање е моќта во Кремљ и наклонетоста на рускиот претседател Владимир Путин.
Шефот на Вагнер, Евгениј Пригожин, е познат по неговите отворени критики, понекогаш дури и директни тиради упатени до Министерството за одбрана. Тој го обвинува министерот Сергеј Шојгу дека не дал доволно муниција за војување. Министерството за одбрана, пак, прави сè што може за да им ја отежни работата на Вагнеровци.
Виктор Соболев е член на Комитетот за одбрана во Државната дума и активно учествува во него. Неодамна тој се залагаше секој што ќе му се придружи на Вагнер да биде осуден на затворска казна до 15 години. Ова не се однесува само на регрутите, туку и на руските војници кои пребегнуваат бидејќи се надеваат на подобри плати и поголем престиж.
Според Соболев, групата Вагнер е „сомнителна и илегална организација“ и само руската држава треба да има збор во формирањето и распоредувањето на вооружените сили.
Борците на Вагнер, како и припадниците на редовните сили одговорија со видео на официјалниот канал на Пригожин.
„Ако се мешаш, копиле, и земјата ја изгуби војната поради копиле како тебе, ќе дојдеме на Црвениот плоштад“, вели еден од војниците.
Соболев веќе привлече внимание со неговите иницијативи. На почетокот на оваа година тој стоеше зад забраната за носење паметни телефони, таблети и брада на фронтот.
Имаше логика за паметните телефони и таблетите, бидејќи тие може да ги оддадат руските позиции на бојното поле, но забраната за носење брада наиде на многу противења, вклучително и од Пригожин и самиот чеченски лидер Рамзан Кадиров, кој носи брада.
„Очигледно, генерал-полковник Соболев има многу слободно време, бидејќи нема ништо друго освен да го препрочитува воениот кодекс на однесување“, рече Кадиров. Пригожин таа мерка ја нарече „апсурдна“ и „архаична“.