Десет дена пред крајот на неговиот мандат, Доналд Трамп се соочува со сè повеќе повици за оставка, дури и од републиканскиот табор, со цел да се избегне тешка процедура за отповикување среде политичка, здравствена и економска криза.
По републиканските сенатори Бен Сас и Лиса Мурковски, сенаторот Пат Томи во неделата на CNN изјави дека оставката на претседателот ќе биде „најдоброто решение“.
По претседателските избори на 3 ноември на кои загуби, Доналд Трамп „го зафати некакво лудило, ги направи работите целосно незамисливи и непростливи“, додаде тој.
„Најдоброто нешто за единството на земјата ќе биде негова оставка“, изјави за ABC Алан Кицингер, член на Претставничкиот дом и првиот републиканец кој веднаш во четвртокот побара претседателот да биде прогласен за „неподобен“ за вршење на функцијата.
Но, американскиот милијардер не дава ни најмал знак дека е подготвен да поднесе оставка, велат неговите советници, пренесува американскиот печат.
Ненси Пелоси, која најави дека ќе преземе нешто доколку претседателот во заминување не се повлече, го повика нејзиниот табор да се врати во Вашингтон оваа недела за да одлучи како да го санкционира Трамп за насилниот упад во Капитол, за кој рече дека го охрабрил давајќи поддршка.
Во отвореното писмо до пратениците, таа не спомна можно отповикување, но истакна дека „апсолутно е потребно оние што учествуваа во нападот на нашата демократија да одговараат за тоа“.
Обвинението, поднесено од Претставничкиот дом и потпишано од најмалку 200 пратеници, го критикува републиканскиот претседател за „свесно давање изјави“ со кои го поттикна нападот на неговите приврзаници врз зградата на Конгресот во средата.