Најскапиот голман во историјата на фудбалот, Кепа Аризабалага (26), кој се најде „замрзнат“ на клупата на Челси со доаѓањето на Едуард Менди, треба да замине на позајмица во зимскиот преоден рок за да ја оживее својата голманска кариера, објавија британските медиуми.
Поради честите грешки на Аризабалага, раководството на Челси на крајот на септември го донесе сенегалскиот голман Едуард Менди (28) од Рен, за кого плати 24 милиони евра отштета. После тоа, Кепа падна во втор план и ја грее клупата на „сините“ од 17 октомври наваму. Откако Менди е прв голман, Челси се снаоѓа одлично.
Кепа сака да се најде на списокот на играчи на шпанската репрезентација за ЕП следната година, но освен тоа што му оди лошо во Челси, неговиот статус во репрезентацијата е исто толку лош. Тој во моментов е третиот голман на „Фуријата“, пред голманот на Манчестер Јунајтед, Давид Де Хеа, кој оваа сезона е во одлична форма, и голманот на Атлетик Билбао, Унаи Симон (23).
Шпанскиот селектор Луис Енрике му рече на Кепи дека нема да брани за националниот тим сѐ додека е резервен во Челси. Затоа, Кепа Аризабалага има намера во зимскиот преоден рок да замине на позајмица во клуб каде што би бил стандарден првотимец, а исто така е подготвен и за значително намалување на платата, што сега изнесува 8,4 милиони евра по сезона.
Кепа Аризабалага премина од Атлетик Билбао во Челси во летото 2018 година, кога за него беа исплатени 80 милиони евра отштета, со што стана најскапиот голман во историјата на фудбалот.
