Горан Пандев и официјално замина во пензија, а од репрезентацијата се зборува уште на ЕУРО 2020. Вистинско време да се потсетиме на неговите мајстории.
Јутјуберот Matejcho, познат по изработка на компилации и хајлајтси од македонскиот фудбал, сега во соработка со Гоце Михајлоски, колекционер на видео-натпревари од македонската репрезентација, изработи видео со сите голови и асистенции кои Пандев ги забележа во дресот со националните бои.
Голови знаеме дека има 38, додека за асистенциите ќе нѐ изненадат Матејчо и Гоце. Пандев 122 натпревара го носеше државниот дрес. Дебитираше на 6 јуни 2001 во Бурса во оној антологиски 3:3 натпревар против Турција, а се пензионираше на 21 јуни 2021 во 3:0 поразот од Холандија на ЕУРО 2020.
Всушност, Пандев има и неофицијално деби бидејќи на 23 декември 2000 година беше дел од репрезентацијата која одигра 1:1 со селекцијата на Астурија, автономна заедница во скоп на Шпанија која не е членка на ФИФА.
