VAZ 2101 се произведуваше од 1970 до 1988 година и е добро познат на љубителите на автомобили во регионот.
Легендарната Lada во суштина беше модифицирана верзија на FIAT 124, кој беше прогласен за „Европски автомобил на годината“ во 1967 година.
Бидејќи е направен во Советскиот Сојуз, пред сѐ за клиенти во тогашните комунистички земји, внатрешноста на Lada 2101 беше скромна и неупадлива.
Тјунинг студио од Бугарија покажа дека овој автомобил сепак има потенцијал за нешто повеќе од евтино превозно средство за граѓаните од Источна Европа, а резултатот е неверојатен.
Компанијата GB Design ја подобри внатрешноста на моделот VAZ 2101 по повод неговиот 50-ти роденден, па скромната Lada беше трансформирана во возило чиј ентериер може да се спореди со најлуксузните возила од тој период.
Според Autoclub.bg, ентериерот е тапациран со најдобра кожа, а инсталирана е и нова инструмент-табла, секако во ретро стил.
Седиштата се позајмени од Toyota и се тапацирани со кожа, а има и потпирач за раце меѓу возачот и совозачот, како и нов аудиосистем.
Воланот е исто така во ретро стил и е направен од дрво.
Потребни беа четири месеци посветена работа да се направи еден ваков автомобил од скромната Lada, а GB Design вели дека станува збор за уникатна модификација.
Фановите на класичната Lada дефинитивно ќе уживаат во фотографиите.