Капитенската лента на Кристијано Роналдо е ставена на хуманитарна аукција на фондацијата „Заедно за живот“, за да се соберат средства за лекување на малиот Гаврило Ѓурѓевиќ.
За само еден ден пристигнаа повеќе од 400 понуди, а по бројните реакции од модераторите на порталот Limundo, моментално најголемата понуда е 6 милиони динари (околу 50.000 евра).
Сепак, српските портали пишуваат дека Србите „се посрамотиле како луѓе“ со срамни лажни понуди на аукцијата. Некои од овие понуди на почетокот изнесувале неколку стотици милиони динари, за да достигнат дури една милијарда и 200 милиони динари (10 милиони евра).
Останува надежта дека актуелната најголема понуда не е измама и дека малиот Гаврило навистина ќе ги добие парите што се нудат, бидејќи за него тоа значи живот.
Останаа нешто помалку од два дена до крајот на аукцијата што ќе заврши во петок, 2 април во 9:39 часот.
Во секој случај, ако се покаже дека наддавачот со највисока понуда лажел, му се заканува кривична пријава.
Роналдо збесна ја фрли лентата на теренот на „Рајко Митиќ“ затоа што судиите не го признаа неговиот гол за победа на Португалија во 93-тата минута од мечот со Србија (2:2).
Дежурен работник на стадионот во тој момент ја зел лентата од теренот и реши да ја донира, со цел да започне хуманитарна аукција што би можело да одекне во фудбалскиот свет.
Сите средства собрани преку оваа аукција ќе бидат наменети за лекување на шестмесечниот Гаврило Ѓурѓевиќ од Крагуевац.
Гаврило страда од мускулна атрофија на 'рбетниот столб, а за неговото лекување се потребни 2.500.000 евра. За жал, семејството нема услови самостојно да ги собере овие средства, па затоа се обратија до пошироката јавност за помош.
Капитенската лента на Кристијано Роналдо ќе биде достапна преку хуманитарна аукција на ОВОЈ ЛИНК до петок во 9:39 часот, а донаторот кој ќе ја понуди најголемата сума дефинитивно ќе добие дел од фудбалската историја.