Се чини дека еднонасочниот вентил за вода без подвижни делови, измислен пред повеќе од 100 години од Никола Тесла, може да се прилагоди за пумпање на течности околу моторот користејќи енергија што инаку би била неискористена.
Тесла го патентирал својот „вентилен (валвуларен) спроводник“ во 1920 година. Тоа е цевка со сложен внатрешен дизајн што ја принудува течноста да се движи во една насока. Кога водата тече кон петелките, таа забавува и протокот застанува. Од друга страна, ако оди во спротивна насока, не влегува во петелките и има слободен проток.
„Внатрешноста на цевката има проширувања, вдлабнатини, испакнатини и прегради кои, иако не даваат скоро никаков отпор на поминувањето на течноста во една насока, освен триење, се скоро непроодна пречка за нејзино течење во спротивна насока“, напишал Тесла во пријавата за патентот.
Експерименталниот физичар Леиф Ристроф од Универзитетот во Њујорк и неговите колеги изградија реплика на вентилот долга 30 сантиметри, следејќи го првичниот план на Тесла и го измерија протокот во двете насоки под различни притисоци.
Иако Тесла тврдел дека неговиот вентил може да го забави протокот на вода до 200 пати во една насока, за разлика од други, репликата направена од научниците го прави тоа само двапати побавно.
„Бил многу имагинативен. Само малку е нејасно дали тој навистина го направил и тестирал тој вентил. Претпоставувам дека го направил, но тоа не е документирано“, рече Ристроф.
Иако ефикасноста на вентилот е многу помала отколку што тврдел Тесла, овој изум сепак би можел да биде многу корисен, пишува New Scientist.
Тимот откри дека нема разлика во отпорноста помеѓу насоките на проток при мала брзина, туку дека вентилот се активира нагло над проток од околу 1 сантиметар во секунда и значително се спротивставува на повратниот проток.
„Овој пронајдок беше познат и можеби бил користен на некои места, или барем бил предложен за употреба. Но, никој никогаш не направил темелна хидродинамичка инспекција за да разбере како и колку добро работи“, наведува Ристроф.
Научниците веруваат дека овој дизајн може да ги искористи вибрациите во моторите и другите машини за пумпање на гориво, течности за ладење, мазива и други гасови и течности.
„Замислете да имате системи кои всушност користат моторни вибрации. Нема подвижни делови, нема што да се скрши“, вели Ристроф.
Студијата Early turbulence and pulsatile flows enhance diodicity of Tesla’s macrofluidic valve на Тесла е објавена во списанието Nature Communications.