Спектаклот во Копенхаген заврши фатално за Манчестер Јунајтед бидејќи младиот 17-годишен Бардаџи донесе пресврт и триумф од 4:3 за Данците во Лигата на шампионите. Имаше с на натпреварот, влегување на Палестинец на теренот, прекини, црвен картон за Маркус Рашфорд, ВАР одлука, пенали, а во сето тоа уживаа и гледачите на трибините и оние крај малите екрани.
Тренерот на Јунајтед, Ерик тен Хаг не беше задоволен од судиските одлуки на литванскиот судија Донатас Румсас, кој исклучувајќи го Рашфорд на крајот од првото полувреме му кумуваше на големиот резултатски пресврт.
„До исклучувањето игравме многу добро, водевме со 2:0, а потоа црвениот картон промени сè. Играта доби поинаков тек. Не сум сигурен дека судијата беше уверен во својата одлука“, рече Тен Хаг.
Експертите Овен Харгривс и Пол Сколс веруваат дека Рашфорд бил престрого исклучен.
„Тоа не е црвен картон ни за жива глава. Маркус ја стави ногата за да ја заштити топката. Кога ќе ја замрзнете сликата, изгледаше опасно, но во реалноста Рашфорд немаше намера да направи фаул. Тој беше само несмасен, тоа беше фаул, никако за црвен“, рече Харгривс.
Сколс додаде:
„Сите разбраа што сака да направи Рашфорд, тој ја спушти ногата за да ја заштити топката и стапна на ривалот. Тоа не е непромислен старт, туку дуел. Одлуката на судијата и неговото разбирање на ситуацијата го доведе во прашање целиот натпревар“.
Тен Хаг имаше директни замерки на двата гола на Копенхаген.
„Кај првиот гол имаше офсајд бидејќи играчот на Копенхаген беше пред Онана. Со пеналот, што да кажеме? Многу одлуки беа против нас. Но, како е - така е. Сезоната е долга“, заклучи Тен Хаг.
