Индиската полиција убила тигар откако тој усмртил најмалку 9 лица во Чампаран, во сојузната држава Бихар.
Наречен „човекојадецот од Чампаран“, ѕверот бил убиен по лов во кој учествувале 200 полицајци и окружни службеници. Некои полицајци патролирале со слонови за да го најдат.
Мажјакот тигар ја тероризиралч заедницата околу „Валмики“ резерватот за тигри.
Акцијата ја предводела полицијата од Бихар, која го опколила полето со шеќерна трска во близина на селото Ситалтола Балува за да го убие тригодишниот тигар познат како Т-104.
Кумар Гупта, главен чувар на дивиот свет во регионот, изјави за Times of India дека тигарот бил идентификуван како „опасен по човечкиот живот“.
Директорот на резерватот за тигри „Валмики“, Несамани К, рече дека последната потрага по Т-104 започнала во саботата, веднаш по објавувањето на веста дека мајка и нејзиното дете биле убиени во напад на тигар.
„Тоа беше непроспиена ноќ за целото село“, изјави Палту Махато за Hindustan Times.
„Обидите да се смири животното беа неуспешни и тигарот покажа целосен недостаток на страв кога беше опкружен од тимовите“, додаде Гупта.
Инаку, Индија е дом на повеќе од 70% од дивите тигри во светот. Резерватите на тигри во Индија, заштитени подрачја каде што животните можат да живеат, не се проширија со иста брзина како и популацијата на тигри. Ова принуди некои големи мачки за да преживеат да се свртат кон пејзажите во кои доминираат луѓето, што доведе до убивање на добиток, а понекогаш и на луѓе.
Според владините податоци објавени во 2019 година, тигрите убиваат помеѓу 40 и 50 луѓе во Индија секоја година.
