Три лица се мртви, меѓу кои и едно дете, а една жена е повредена откако авион се урна врз автомобил во движење во населеното место Пембрук Пајнс во Флорида, во близина на аеродромот Норт Пери.
Полицијата и спасувачката екипа во Пембрук Пајнс одговорија на местото на инцидентот околу 15 часот по локално време.
Во моментот на инцидентот, во авионот Beechcraft Bonanza се наоѓале две лица кои биле прогласени за мртви на лице место.
Истражителите на Федералната администрација за авијација соопштија дека авионот бил принуден да се сврти назад кон аеродромот Норт Пери, кратко по полетувањето. Авионот удрил во автомбилот на неколку стотици метри пред пистата, откако се заплеткал во далекувод.
Жената и детето кои биле во СУВ возилото биле пренесени во регионалната болница со трауматски повреди. Шефот на Противпожарната служба Марсел Родригез потврди дека момчето починало од повредите во понеделникот доцна вечерта.
Од објавените снимки се гледа дека жената била свесна и будна додека била сместена во задниот дел на возилото на Брзата помош. Детето било заглавено во автомобилот и пожарникарите морале да го ослободат.
„Никогаш не сум видел вакво нешто во животот“, рече Сала Елшаер, кој веднаш побарал помош од итните служби, откако се случил инцидентот.
„Автомобилот буквално изгледа како да е пресечен на половина. Размислував за семејството на пилотот. Тоа е толку тажно, и ги видов луѓето таму. Беа повредени, шокантно е.“
Една жена рече дека пристигнала дома неколку минути пред да падне авионот. Таа додаде дека нејзините деца биле во предниот двор кога се случил инцидентот, но тие се добро и не се повредени.
„Слушнавме нешто како бомба, како огромна бучава и излеговме надвор и сè беше во пламен“, рече Анабел Фернандез. „Сè беше лошо, и знаете, удрил во автомобил. Авионот можеше да нè убие сите, во шок сме“.
Моментот на ударот бил снимен од домашна безбедносна камера за надзор поставена во близина на нејзиниот дом.
*Внимание! Содржината на видеоснимката може да Ве вознемири!