Тројца војници на Националната гарда загинаа во пад на хеликоптер за време на рутински тренинг во сојузната држава Њујорк, пренесе CNN.
Несреќата се случи во Мендон, гратче јужно од Рочестер, соопшти војската. Итните служби велат дека хеликоптерот горел по нивното доаѓање. Инцидентот е под истрага, но не се познати деталите за несреќата.
„Ова е тежок товар за сите нас. Изгубивме тројца храбри Американци кои служеа на нашата земја“, изјави шерфиот Тод К. Бакстер.
За смртта на војниците се огласи и гувернерот на Њујорк, Ендру Куомо.
„Членовите на Националната гарда се наши војници кои доброволно служат и штитат овде и во странство. Упатувам молитви и сочувство на блиските луѓе на овие чесни херои кои никогаш нема да ги заборавиме“, изјави Куомо.
Тој нареди знамињата на сите државни згради да бидат спуштени на половина копје во чест на загинатите војници.
