Португалија испрати жалба до УЕФА за редовно постигнатиот, но непризнаен гол на Кристијано Роналдо против Србија (2:2) во судиското надополнување на натпреварот од квалификациите за СП.
Португалската фудбалската федерација поднесе три барања во жалбата до УЕФА. Првите две се потребата да се користи ВАР и да се сигнализира дека топката ја преминала гол-линијата во квалификациите за СП, бидејќи нема видеотехнологија во тоа натпреварување. Португалците се свесни дека резултатот од натпреварот не може да се менува, но посочуваат дека го бараат ова за да не се повторат толку големи грешки. Третото барање е суспензија на судијата Дани Макели кој го водеше натпреварот.
Уште истиот ден, европскиот шампион доби одговор од Европската фудбалска унија. УЕФА наведува дека имала намера да воведе ВАР за квалификациите за СП, но дека напорите биле прекинати поради комплицираната ситуација предизвикана од корона пандемијата.
„Уште во 2019 година, ѝ предложивме на ФИФА користење на ВАР технологија во тековните квалификации за Светското првенство. Сепак, влијанието на пандемијата врз оперативните и логистичките можности ја натера УЕФА да ја одложи употребата на ВАР технологијата во групната фаза во Лига Европа за сезоната 2021/2022 наместо оваа сезона, како и да се повлече предлогот за употреба на ВАР во европските квалификации за СП 2022 година“.
За потсетување, во третата минута од судиското надополнување, Кристијано Роналдо го совлада Марко Домитровиќ, голманот на Србија, кој истрча од голот и топката се истркала во празниот гол. Топката очигледно помина со целиот обем преку гол-линијата, кога Стефан Митровиќ со лизгачки старт ја спречи да оди понатаму и да ја затресе мрежата, па главниот судија Макели и помошниот Марио Дикс не видоа дека Португалија навистина постигна гол.
Роналдо веќе почна да го слави голот, но збесна кога виде дека судиите не го признаа. Не можеше да има ВАР проверка бидејќи ни технологијата, ни ваквиот судиски асистент не се користат во квалификациите за СП.
Капитенот на Португалија мавташе со рацете во неверување, им викаше на судиите, ја тргна капитенската лента и ја фрли на теренот, па демонстративно го напушти теренот и се упати кон тунелот на Маракана, иако натпреварот сè уште траеше.
