Финалето на Лигата на шампионите за сезоната 2029/2030 ќе се игра во Абу Даби, ОАЕ како дел од новиот шестгодишен договор на УЕФА со таа богата земја, вреден дури 2,2 милијарди евра, пишува шпански OK Diario.
Овој договор со Емиратите е одговор на судската одлука поврзана со проектот Суперлига, кој се очекува наскоро во Луксембург и би важел од следната сезона.
„УЕФА знае дека на 21 декември може да ја изгуби тужбата пред Судот на Европската Унија поврзана со Суперлигата и се договори со Абу Даби да ја спонзорира Лигата на шампионите. Тие сакаат да ја направат поатрактивна за клубовите и да избегнат дезертирања во Суперлигата“, изјави Едуардо Инда во емисијата „El Chiringuito de Jugones“.
Одлуката треба да стане официјална на следниот состанок на Извршниот одбор на УЕФА во Париз на 7 февруари пред жрепката за четвртото издание на Лигата на нации.
Главен човек за извршување на проектот од страна на УЕФА е заменик генералниот секретар Џорџо Маркети, кој се консултира со Извршниот одбор за да се увери дека сè ќе помине без проблеми.
Според шпанските медиуми, УЕФА ќе ги продаде правата за сите натпреварувања на УЕФА, вклучително и женски фудбал и футсал, за регионот на Блискиот Исток.
