Украина поврати дополнителна територија по должината на линијата на јужниот фронт, а ситуацијата на бојното поле малку се промени во текот на изминатата недела, изјави денеска заменик-министерката за одбрана на Украина, Хана Малијар.
Малијар рече дека од почетокот на украинската контраофанзива украинските сили ослободиле околу 130 квадратни километри на југот на Украина. Таа пред една недела рече дека во контраофанзивата се ослободени 113 квадратни километри.
Малијар за украинскиот јавен сервис прецизира дека минатата недела имало околу 250 судири по должината на источниот дел од линијата на фронтот, кој ги опфаќа насоките Лиман, Бахмут, Авдијивка и Маринка, наведувајќи дека во таа област сè уште се водат тешки борби.
Украинската армија денес објави дека напреднала меѓу 600 и 1.000 метри на јужниот и на северниот раб на Бахмут (Артјомовск), град што силите на Вагнер го зазедоа во мај.
Украинската армија исто така пријави напредок во саботата, кога силите на руската приватна воена компанија за време на бунтот маршираа кон Москва, пренесува The Guardian.
Не беше можно да се потврдат тие извештаи.
Украинските власти посочија дека востанието на Вагнер во саботата ѝ дало можност на украинската армија да напредува во контраофанзива.
