Тренерот на Вардар со одлична тактичка поставеност тотално го неутрализираше градскиот ривал и малку фалеше и да слави победа.
Во саботата Работнички и Вардар го одиграа 91. Дерби на Скопје кое датира уште од далечната 1951 година кога во рамките на Втората југословенска лига овие два тима за првпат ги одмерија силите.
„Задоволен сум бидејќи одигравме добар натпревар. Имавме шанси и да победиме, но на крајот паднавме кондициски па примивме гол. Само една недела имавме подготовски и еве, имаме 4 бодови од 4 натпревари. Одлично му се спротивставивме на Работнички кој создаде малку шанси. Навистина сум задоволен од тоа како одиграа моите фудбалери“, вели Александар Васоски.
Работнички важеше за голем фаворит, но на крајот дури едвај стигна и до реми. Дарко Мицевски во 59. минута му донесе водство на Вардар по одлична асистенција од Филип Петковски, а 17-годишниот Лука Станковски во 76. минута израмни со својот деби гол во Првата лига.
За Вардар сега следува и тоа како потребна пауза поради репрезентативни настапи. Со оглед на тоа што „Вардарци“ подготовките за новата сезона ги почнаа само недела дена пред 1. коло, паузата е и тоа како добредојдена за мини-подготовки за играчите да влезат во ритам и да набилдаат кондиција.
Следниот натпревар на Вардар е на 13 септември кога на домашен терен ќе го пречека Шкупи.
